Հոգու նահանջի գաղափարը Շիրվանզադեի «Արտիստը» պատմվածքում

Դեկտեմբերի 4-ին բաց դաս էր 8Բդասարանում: Դասի թեման էր «Հոգու նահանջի գաղափարը Շիրվանզադեի «Արտիստը» պատմվածքում»:«Հեղինակային աթոռ» մեթոդով ներկայացվեց Լևոնի կյանքի դրաման, վերհանվեցին այն խնդիրները, որոնց բախվում է դեռահասը, արժևորվեց հասարակության դերը դեռահասի ձևավորման մեջ: Դասն ամփոփվեց այն գաղափարով, որ ինքնասպանությունը ելք չէ, և դա հնչեց հոգու նահանջ ապրող դեռահասի շուրթերով. «Ցանկացած պարագայում, ցանկացած իրավիճակում նույնիսկ բավական է ընդամենը վաղվան սպասել , և նոր գույներով ու նոր անակնկալներով հանդերձ օրը կարող է շատ բան փոխել ու ստիպել այլ կերպ նայել ամեն ինչին, այն ինչի համար այսօր կարելի է ապրել կամ մեռնել, վաղը այնքան պրիմիտիվ ու անհեթեթ կթվա մեզ, որ նույնիսկ ծիծաղի տեղիք կտա»:

Բաց դաս՝ նվիրված Սպիտակի երկրաշարժի 30-րդ տարելիցին

Դեկտեմբերի 6-ին Վանաձորի N25 հիմնական դպրոցում աշխարհագրության ուսուցչուհի Լ. Սոխակյանի նախաձեռնությամբ 8Ա դասարանի աշակերտների (դասղեկ՝ Մ. Արզումանյան) հետ կազմակերպվեց բաց դաս՝ նվիրված Սպիտակի երկրաշարժի 30-րդ տարելիցին: ​Սպիտակի երկրաշարժ, որն իր երկու` իրար հաջորդող հզոր ցնցումներով Հայաստանի Խորհրդային Հանրապետության մի զգալի հատվածը՝ 700 հազարից ավել բնակչությամբ, մի քանի վայրկյանում վերածեց աղետի գոտու: Բնական աղետից մարդկային ու նյութական կորուստները շատ ավելին եղան, իսկ հետևանքները ավելի ծանր, որոնք լիովին դեռ հաղթահարված չեն, թեև 30 տարի է անցել 1988 թ. դեկտեմբերի 7-ից հետո: ​Դասին աշակերտները իրազեկվեցին, թե ինչպիսի վարքականոններ պետք է կիրառեն երկրաշարժից առաջ, երկրաշարժի ժամանակ և երկրաշարժից հետո: Դպրոցում 11:41 րոպեին կազմակերպվեց տարհանում: Խնդիր էր դրված, որ մի քանի աշակերտ չեն կարողացել դուրս գալ, և փրկարար ջոկատը՝ գտնելով նրանց, անվտանգ դուրս է բերում շենքից:

«Բարին արա» -ն մեր դպրոցում

«Բարին արա» 11-րդ համաքաղաքային բարեգործական ակցիային Վանաձորի Վ. Համբարձումյանի անվան թիվ 25 հիմնական դպրոցը մասնակցեց մեկ ընդհանուր համադպրոցական միջոցառումով՝ «Մի գեղեցիկ օր մանուկներին» խորագրով:
Դպրոցի ծնողական խորհուրդը, աշակերտական խորհուրդը, VIIIԱ, VIIIԲ, VIIIԳ, IXԱ, IXԲ, IXԳ դասարանների աշակերտների (թվով 193) անմիջական մասնակցությամբ հավաքագրվեց գումար, որը ծառայեց երեխաների մեկ օրը դարձնելով անմոռանալի՝ դպրոց հրավիրելով ծաղրածու, հեքիաթի հերոսներ: Միջոցառումն ուղեկցվեց երգով, պարով, ասմունքով, խաղերով:
Միջոցառումը կազմակերպված էր նախակրթարան հաճախող երեխաների, IԱ, IԲ, IԳ, IIԱ, IIԲ, IIԳ դասարանների և ներառական կրթության մեջ ընդգրկված աշակերտների համար (թվով 244):